Liga o‘tgan yilning avgust oyida ishlab chiqqan taqvim reja bo‘yicha Superliga bellashuvlarining katta qismi shanba va yakshanba kuniga to‘g‘ri kelishi, shuningdek, mavsumning birinchi davrasi iyun oyida to‘liq yakuniga yetib (evaziga kubok formatiga o‘zgartirish kiritilgandi), ikkinchi davra yozgi transfer oynasidan keyin o‘z vaqtida start olishi rejalashtirilgandi. Shundan kelib chiqib, Liga FIFA TMS portalida O‘zbekistondagi yozgi transfer oynasini 22 iyun — 24 iyul sifatida belgilagandi.
Milliy terma jamoaning 5 maydan e’tiboran yig‘inga kirishishi Liga rejalari o‘zgarishiga olib keldi. Endilikda mavsumning birinchi davrasi tanaffusga qadar nihoyalanmaydi. Faqatgina 6 avgust sanasiga kelibgina Superliganing dastlabki 15 turi ortda qoladi.
Shundan kelib chiqib, Liga klublar bilan maslahatlashgan holda yozgi transfer oynasi davriga o‘zgartirish kiritdi. Endilikda bu davr 8 iyuldan start oladi va 10 avgust sanasiga qadar davom etadi.
