«Tottenxem» klubini Roberto De Dzerbi bilan bog‘lashmoqda. Italiyalik mutaxassis ushbu lavozimni egallashga tayyor, biroq shu bilan birga Chempionshipda ishlashni istamayapti. Umuman olganda, vaziyat ancha chigal.
Shuningdek, The Times nashri qiziqarli variant haqida yozmoqda — De Dzerbi yaqin vaqt ichida «Tottenxem»ni qabul qilib olishi mumkin, ammo bu holatda uning shartnomasiga jamoa Premyer-ligadan tushib ketsa, kelishuvni bekor qilish imkonini beruvchi band kiritiladi. Bunday shartnoma klub manfaatlariga qanchalik mos kelishini aytish qiyin, chunki aslida murabbiy natija yomon bo‘lsa, uning uchun rasman javobgar bo‘lmaydi.
Hozirda «Tottenxem» APL turnir jadvalida 17-o‘rinni egallab turibdi. Xavfli hududdan farq minimal darajada — bor-yo‘g‘i bir ochkoni tashkil etadi.
