Angliyaning «Aston Villa» klubi shu yozda «PSJ»ning yosh iqtidori Ibrahim Mbayeni sotib olishni rejalashtirayotgan bir nechta Premyer-liga jamoalari qatoridan joy oldi.
18 yoshli hujumchi Yevropaning eng istiqbolli futbolchilaridan biri hisoblanadi. U joriy mavsumda 25 ta o‘yinda maydonga tushdi, biroq ularning aksariyatida zaxiradan o‘yinga qo‘shildi. Shu sababli, futbolchiga asosiy tarkibda muntazam o‘yin amaliyotini kafolatlaydigan transfer varianti ko‘rib chiqilmoqda. Biroq, «Aston Villa» bu yo‘lda jiddiy raqobatga duch kelishi aniq va klubning Chempionlar Ligasi yo‘llanmasini qo‘lga kiritishi transferda hal qiluvchi omil bo‘lishi mumkin.
«PSJ» akademiyasi tarbiyalanuvchisi bo‘lgan Mbaye 16 yoshida debyut qilib, klub tarixidagi eng yosh debyutantga aylangan edi. Shuningdek, u Senegal terma jamoasi safida Afrika Millatlar Kubogida ishtirok etib, pley-off bosqichida gol urishga ham ulgurdi.
