Braziliya terma jamoasining sobiq futbolchisi Romario jamoa bosh murabbiyi Karlo Anchelottiga Neymar borasida maslahat berdi. Romarioning fikricha, Anchelotti Neymarni JCH-2026 qaydnomasiga kiritgani ma’qul.

«Yulduz o‘ynashi kerak. Terma jamoa — eng iqtidorli futbolchilar yig‘iladigan joy. Jahon chempionatiga tayyorgarlik bir oy davom etadi — bu vaqt sportchining jismoniy va texnik jihatdan tiklanishi uchun yetarli.

Buni hamma biladi, lekin doimo takrorlash kerak: 100 foiz tayyor bo‘lmasa ham, Neymar kabi yulduzga ega bo‘lish boshqa futbolchini chaqirishdan ko‘ra yaxshiroqdir. Iqtidor bekorga ketmaydi. Men Neymarning chaqiruv olishini va uyga jahon kubogini olib kelishini ko‘rishni istayman. Men Neymarning Mundialga borishi tarafdoriman, lekin u bo‘lmagan taqdirda ham Braziliyaga muxlislik qilaveraman. Biroq mana bu mening murojaatim: e’tibor qarat, murabbiy!» — deya Romarioning so‘zlaridan iqtibos keltirmoqda The Touchline.

Jahon chempionatining guruh bosqichida Braziliya terma jamoasi Marokash, Gaiti va Shotlandiyaga qarshi bahs olib boradi.