«Manchester Siti» bosh murabbiyi Xosep Gvardiola «Barselona»ning Xans-Diter Flik qo‘l ostidagi o‘yinidan hayratda ekanini bildirdi.

«Ko‘k-anorranglilar» yorqin hujumkor uslubda o‘ynamoqda va «shaharliklar» ustozining fikricha, bu tashqi kuzatuvchiga manzur bo‘lmasligining iloji yo‘q.

«Imkon topdim deguncha Flikning «Barselona»si ishtirokidagi o‘yinlarni tomosha qilaman, chunki bu zavq bag‘ishlaydi. Ba’zan biz hamma narsani haddan tashqari murakkablashtirib yuboramiz, biroq, oxir-oqibat, kinoga yoki yaxshi restoranga borganingda shunchaki hordiq chiqarishni xohlaysan. Ayting-chi, «Barsa»ning o‘yinidan zavqlanmagan biror holat bo‘lganmi?» – deya Gvardiolaning so‘zlarini keltirmoqda Football Talk.

Eslatib o‘tamiz, ispaniyalik mutaxassis 2008 yildan 2012 yilgacha Kataloniya klubida ishlagan. Flik esa bu lavozimni 2024 yilda egalladi.