Yaqinda Kilian Mbappe tizzasidan olgan jarohatidan so‘ng safga qaytdi, ushbu jarohat sababli hujumchi taxminan uch haftani o‘tkazib yuborgan edi.

Matbuotda hayratlanarli ma’lumot paydo bo‘ldi: Madridning «Real» klubida futbolchining noto‘g‘ri tizzasi tekshirilgan. RMC Sport xabariga ko‘ra, yulduz hujumchining yaqinlari bundan hayratda va bunday darajadagi klubda qanday qilib bunday xatoga yo‘l qo‘yilganini tushunishmayapti.

Kilian Mbappe safga qaytganidan beri ikki bor maydonda ko‘rinish berishga ulgurdi: u «Manchester Siti» va Madridning «Atletiko» jamoalariga qarshi uchrashuvlarda zaxiradan maydonga tushdi. Ushbu o‘yinlar «qaymoqranglilar»ning mos ravishda 2:1 va 3:2 hisobidagi g‘alabasi bilan yakunlandi. Didye Desham yaqindagi jarohatiga qaramay, 27 yoshli futbolchini bo‘lajak o‘rtoqlik uchrashuvlari uchun Fransiya terma jamoasiga chaqirdi.