Italiya terma jamoasi ustozi Jennaro Gattuzo jamoa Shimoliy Irlandiyaga qarshi o‘tish o‘yiniga (pley-off) qanday kayfiyatda yondashishi kerakligi haqida gapirdi.

Jahon chempionati yo‘llanmasi uchun pley-off bosqichining yarim finali payshanba kuni bo‘lib o‘tadi. «Skuadra Adzurra» uchun o‘z uyida kechadigan ushbu uchrashuv Toshkent vaqti bilan tungi soat 00:45 da boshlanadi.

«Hammasi o‘zimizga bog‘liq. Agar maydonga tushib, hamma narsa nazoratimizda ekanligini ko‘rsata olsak, qolgani o‘z-o‘zidan hal bo‘ladi. Biz kimgadir tayana olmaymiz — o‘z taqdirimizning yaratuvchisi o‘zimizmiz. Xotirjamlikni saqlash va qarshimizda juda yuqori ishtiyoq bilan tushadigan raqib borligini tushunish muhim», — dedi Gattuzo matbuot anjumanida.

Eslatib o‘tamiz, Italiya terma jamoasi 2014 yildan beri Jahon chempionatining final bosqichida ishtirok etmayapti.