Италия терма жамоаси устози Женнаро Гаттузо жамоа Шимолий Ирландияга қарши ўтиш ўйинига (плей-офф) қандай кайфиятда ёндашиши кераклиги ҳақида гапирди.
Жаҳон чемпионати йўлланмаси учун плей-офф босқичининг ярим финали пайшанба куни бўлиб ўтади. «Скуадра Адзурра» учун ўз уйида кечадиган ушбу учрашув Тошкент вақти билан тунги соат 00:45 да бошланади.
«Ҳаммаси ўзимизга боғлиқ. Агар майдонга тушиб, ҳамма нарса назоратимизда эканлигини кўрсата олсак, қолгани ўз-ўзидан ҳал бўлади. Биз кимгадир таяна олмаймиз — ўз тақдиримизнинг яратувчиси ўзимизмиз. Хотиржамликни сақлаш ва қаршимизда жуда юқори иштиёқ билан тушадиган рақиб борлигини тушуниш муҳим», — деди Гаттузо матбуот анжуманида.
Эслатиб ўтамиз, Италия терма жамоаси 2014 йилдан бери Жаҳон чемпионатининг финал босқичида иштирок этмаяпти.
