Bir qator klublar «Inter» yarim himoyachisi Nikolo Barellani o‘z safiga qo‘shib olishga qiziqish bildirmoqda.

Insayder Fabrisio Romanoning ma’lumotlariga ko‘ra, OAVdagi mish-mishlarga qaramay, hozirda xavbekning yaqin orada jamoadan ketishiga ishora qiluvchi hech qanday muzokaralar olib borilmayapti. Avvalroq «Nyukasl» va Saudiya Arabistoni klublari futbolchiga qiziqish bildirgan edi, biroq Barellaning o‘zi hech qachon «Inter»ni tark etishni istamagan.

Nikolo Barella 2020 yilda «Kalyari»dan «Inter»ga 32 million yevro evaziga o‘tgan edi. Uning Milan klubi bilan amaldagi shartnomasi 2029 yilning 30 iyuniga qadar mo‘ljallangan. Joriy mavsumda yarim himoyachi barcha turnirlarda 36 ta o‘yinda maydonga tushib, bitta gol urdi va sakkizta golli uzatmani amalga oshirdi.