«Liverpul»ning sobiq futbolchisi Jeymi Karrager Yurgen Klopp namoyish etgan futbol unga juda manzur bo‘lganini ta’kidladi.

«Yurgen Kloppning «Liverpul»dagi futboli dunyodagi eng yaxshi futbol edi. U eng muvaffaqiyatlisi bo‘lmagandir — bu borada Pep Gvardiolaning xizmatlari katta — lekin Kloppning futboli eng hayajonli va jozibador edi», — deya Karragerning so‘zlarini keltiradi The Touchline nashri.

Yurgen Klopp 2015–2024 yillarda «Liverpul»ni boshqargan. 2025 yil boshidan buyon germaniyalik mutaxassis «Red Bull» futbol tizimida faoliyat yuritmoqda. Matbuotda vaqti-vaqti bilan Kloppning nomi Madridning «Real» klubi bilan bog‘lanmoqda.

Klopp ketganidan so‘ng «Liverpul»ni Arne Slot boshqarmoqda. Hozirda jamoa Premyer-liga turnir jadvalida beshinchi o‘rinni egallab turibdi.