Argentina futboli afsonasi Gabriel Batistuta fikricha, Diyego Maradona Lionel Messidan ustun.

«Lionel Messi 1000 ta gol urgan, Maradona esa 200 ta. Messi sokin, Maradona esa bunday emasdi.

Men uchun Maradona — eng yaxshisi. U o‘ynay olardi, hakamlar va raqiblar bilan ham kurasha olardi. Ajoyib ishlar qilardi.

Messi ham shunday qila oladi, lekin unda o‘sha xarizma yo‘q», — deya Batistutaning so‘zlarini keltiradi AS.

Avvalroq IFFHS versiyasiga ko‘ra, Messi futbol tarixidagi eng yaxshi o‘yinchi deb topilgani ma’lum qilingandi. Bu reytingda Krishtianu Ronaldu kuchli uchlikka kirmagan.

38 yoshli Messi — jahon chempioni, ikki karra Amerika Kubogi g‘olibi va sakkiz karra «Oltin to‘p» sohibidir. Hozirda u «Inter Mayami» safida to‘p surmoqda.

Diyego Maradona esa 1986 yilgi jahon chempioni, 1990 yilgi vise-chempion hisoblanadi. U klub miqyosida «Boka Xuniors», «Barselona» va «Napoli» jamoalarida o‘ynagan. Italiya chempionatida ikki marta g‘olib chiqqan, UYEFA Kubogi, Ispaniya Kubogi va Argentina chempionligini qo‘lga kiritgan.

Eslatib o‘tamiz, Diyego Maradona 2020 yilda 60 yoshida vafot etgan. Dastlab o‘lim sababi sifatida infarkt ko‘rsatilgan, ammo keyinchalik afsonaning vafotiga shifokorlarning noto‘g‘ri harakatlari ham sabab bo‘lgani aytilgan.