Angliya terma jamoasi bosh murabbiyi Tomas Tuxel o‘ng qanot himoyachisi Trent Aleksander-Arnoldni tarkibga chaqirmaslik qarori borasidagi navbatdagi savolga javob berdi.

«Real Madrid» futbolchisining «uch sherlar»ning bo‘lajak o‘rtoqlik uchrashuvlari uchun qaydnomasidan joy olmagani ko‘plab bahs-munozaralarga sabab bo‘ldi.

«Bunday darajadagi futbolchini terma jamoadan tashqarida qoldirganingizda shov-shuv ko‘tarilishi tabiiy ekanini bilaman. Trent bilan telefon orqali gaplashdik va men unga vaziyatni tushuntirishga harakat qildim. U shunchaki borini qabul qilishi kerak. Bu qiyin va ehtimol ma’lum ma’noda adolatsiz tanlovdir, lekin bunday qarorlarni qabul qilish shart», — dedi Tuxel matbuot anjumanida.

Angliyaliklar Urugvay va Yaponiya terma jamoalariga qarshi maydonga tushishadi. Bahslar mos ravishda 27 va 31 mart kunlari bo‘lib o‘tadi.