Англия терма жамоаси бош мураббийи Томас Тухель ўнг қанот ҳимоячиси Трент Александер-Арнольдни таркибга чақирмаслик қарори борасидаги навбатдаги саволга жавоб берди.
«Реал Мадрид» футболчисининг «уч шерлар»нинг бўлажак ўртоқлик учрашувлари учун қайдномасидан жой олмагани кўплаб баҳс-мунозараларга сабаб бўлди.
«Бундай даражадаги футболчини терма жамоадан ташқарида қолдирганингизда шов-шув кўтарилиши табиий эканини биламан. Трент билан телефон орқали гаплашдик ва мен унга вазиятни тушунтиришга ҳаракат қилдим. У шунчаки борини қабул қилиши керак. Бу қийин ва эҳтимол маълум маънода адолатсиз танловдир, лекин бундай қарорларни қабул қилиш шарт», — деди Тухель матбуот анжуманида.
Англияликлар Уругвай ва Япония терма жамоаларига қарши майдонга тушишади. Баҳслар мос равишда 27 ва 31 март кунлари бўлиб ўтади.
