Chexiya terma jamoasi va Angliyaning «Vest Xem» klubi a’zosi Tomash Souchek Irlandiyaga qarshi kechgan bahs yakunlari haqida to‘xtaldi. Chexiyaliklar JCH-2026 pley-off yarim finalida raqibni penaltilar seriyasida mag‘lub etishdi (asosiy va qo‘shimcha vaqtda 2:2 hisobi qayd etilgandi).

«Biz tarix yaratishga bir qadam qolganini tushunib turibmiz. Oxirgi marta Jahon chempionatida ishtirok etganimizga 20 yil bo‘ldi va biz u yerga borish uchun qo‘limizdan kelgan barcha ishni qilamiz», — deya futbolchining so‘zlarini keltiradi UEFA rasmiy sayti.

Shuningdek, Souchek jamoasining navbatdagi raqibi — Daniya terma jamoasi ancha kuchli ekanini va bu pley-off finaliga tayyorgarlikda yanada ko‘proq diqqat-e’tibor talab qilishini ta’kidladi. Hal qiluvchi o‘yin 31 mart kuni bo‘lib o‘tadi. Daniyaliklar o‘z yarim finalida Shimoliy Makedoniyani 4:0 hisobida tor-mor etishgan.