Чехия терма жамоаси ва Англиянинг «Вест Хэм» клуби аъзоси Томаш Соучек Ирландияга қарши кечган баҳс якунлари ҳақида тўхталди. Чехияликлар ЖЧ-2026 плей-офф ярим финалида рақибни пенальтилар сериясида мағлуб этишди (асосий ва қўшимча вақтда 2:2 ҳисоби қайд этилганди).
«Биз тарих яратишга бир қадам қолганини тушуниб турибмиз. Охирги марта Жаҳон чемпионатида иштирок этганимизга 20 йил бўлди ва биз у ерга бориш учун қўлимиздан келган барча ишни қиламиз», — дея футболчининг сўзларини келтиради УЕФА расмий сайти.
Шунингдек, Соучек жамоасининг навбатдаги рақиби — Дания терма жамоаси анча кучли эканини ва бу плей-офф финалига тайёргарликда янада кўпроқ диққат-эътибор талаб қилишини таъкидлади. Ҳал қилувчи ўйин 31 март куни бўлиб ўтади. Данияликлар ўз ярим финалида Шимолий Македонияни 4:0 ҳисобида тор-мор этишган.
