«Liverpul»ning sobiq bosh murabbiyi Yurgen Klopp Mikel Arteta boshqaruvidagi «Arsenal»ga qarshi kechgan qarama-qarshiliklarni yodga oldi.

Germaniyalik mutaxassis ispaniyalik murabbiy qo‘l ostidagi «to‘pchilar» uning «Liverpul»i uchun eng qiyin raqiblardan biri bo‘lganini tan oldi.

«Men doim Artetaning «Arsenal»iga qarshi o‘yinlarga uzoq vaqt tayyorgarlik ko‘rishimga to‘g‘ri kelardi. Bu jamoani mag‘lub etish juda qiyin edi. Bunday raqib bilan uchrashuvda shunchaki borib, uch ochkoni qo‘lga kiritib bo‘lmaydi», — deya ingliz OAVlari Kloppning intervyusidan iqtibos keltirmoqda.

Mikel Arteta 2019 yilning oxirida «Arsenal» ustozi lavozimini egallagan edi. Yurgen Klopp esa «Liverpul»da 2015 yildan 2024 yilgacha faoliyat yuritgan.

Hozirgi vaqtda londonliklar Premyer-liga turnir jadvalida «Manchester Siti»ni to‘qqiz ochkoga ortda qoldirgan holda peshqadamlik qilmoqda.