Londonning “Tottenhem” klubi bosh murabbiy Igor Tudor bilan amaldagi shartnoma o‘zaro kelishuvga ko‘ra bekor qilinganini rasman e’lon qildi. Tudor bilan birga darvozabonlar murabbiyi Tomislav Rogich va jismoniy tayyorgarlik bo‘yicha murabbiy Rikkardo Ragnachchi ham o‘z lavozimini tark etdi.

Klub rahbariyati murabbiylar shtabiga so‘nggi olti hafta davomidagi mehnatlari uchun minnatdorchilik bildirdi. Shuningdek, klub Igor Tudorga yaqin insonidan ayrilgani munosabati bilan hamdardlik izhor qildi.

Igor Tudor jamoani joriy yilning 14 fevralidan buyon boshqarib kelayotgan edi. Uning qo‘l ostida “shporlar” 7 ta uchrashuvda maydonga tushib, shularning 5 tasida mag‘lubiyatga uchradi. Hozirda jamoa 30 ochko bilan turnir jadvalida 17-o‘rinni egallab turibdi va ularni xavfli zonadan bor-yo‘g‘i bir ochko ajratib turibdi.

E’tiborlisi, “Tottenhem” bir yilga qolmasdan uchinchi bor bosh murabbiyni almashtirmoqda. Bungacha klub Anjelos Postekoglu va Tomas Frank bilan ham xayrlashgan edi. Yangi bosh murabbiy nomi tez orada e’lon qilinishi kutilmoqda.