Лондоннинг “Тоттенҳэм” клуби бош мураббий Игор Тудор билан амалдаги шартнома ўзаро келишувга кўра бекор қилинганини расман эълон қилди. Тудор билан бирга дарвозабонлар мураббийи Томислав Рогич ва жисмоний тайёргарлик бўйича мураббий Риккардо Рагначчи ҳам ўз лавозимини тарк этди.

Клуб раҳбарияти мураббийлар штабига сўнгги олти ҳафта давомидаги меҳнатлари учун миннатдорчилик билдирди. Шунингдек, клуб Игор Тудорга яқин инсонидан айрилгани муносабати билан ҳамдардлик изҳор қилди.

Игор Тудор жамоани жорий йилнинг 14 февралидан буён бошқариб келаётган эди. Унинг қўл остида “шпорлар” 7 та учрашувда майдонга тушиб, шуларнинг 5 тасида мағлубиятга учради. Ҳозирда жамоа 30 очко билан турнир жадвалида 17-ўринни эгаллаб турибди ва уларни хавфли зонадан бор-йўғи бир очко ажратиб турибди.

Эътиборлиси, “Тоттенҳэм” бир йилга қолмасдан учинчи бор бош мураббийни алмаштирмоқда. Бунгача клуб Анжелос Постекоглу ва Томас Франк билан ҳам хайрлашган эди. Янги бош мураббий номи тез орада эълон қилиниши кутилмоқда.