2023 yilda «Milan»dan «Atalanta»ga o‘tish Sharl de Ketelarega o‘z obro‘sini va Italiya chempionatidagi kelajagini saqlab qolish imkonini berdi. Endilikda u o‘z kelajagini faqat hozirgi klubi bilan bog‘lamoqda va jamoa bilan 2028 yilgacha mo‘ljallangan shartnomaga ega. Biroq, de Ketelarening tushuntirishicha, gap faqat shartnoma majburiyatlarida emas.
«Men bu yerda, «Atalanta»da baxtliman. Menimcha, klub bilan uzoq muddatli shartnomam bor. Ba’zida bor narsani qadrlashni va unga mahkam bog‘lanishni bilish kerak», — deya belgiyalik futbolchining so‘zlarini pianetamilan.it nashri keltirmoqda.
Qayd etish lozimki, «Atalanta» ayni damda Italiya A Seriyasi turnir jadvalida yettinchi o‘rinni egallab turibdi.
