Ispaniya qirollik futbol federasiyasi (RFEF) «Barselona» klubini Lamin Yamal terma jamoaning mart oyidagi o‘yinlarida haddan tashqari zo‘riqtirilmasligiga ishontirdi.

Juma kuni «blaugrana» vingeri Serbiyaga qarshi kechgan o‘rtoqlik uchrashuvida (3:0) 63 daqiqa harakat qildi. Bungacha u yig‘in boshida milliy jamoadan alohida ajralgan holda, velotrenajyorda mashg‘ulot o‘tagan edi.

«Barselona» rahbariyati vinger Rafinyaning Braziliya terma jamoasi safida Fransiyaga qarshi (1:2) kechgan o‘rtoqlik o‘yinida sonidan jarohat olib, 5 haftaga safdan chiqqanidan xavotirga tushgan.

Shu sababli, Ispaniya terma jamoasi texnik direktori Aytor Karanka kataloniyaliklar sport direktori Dekuni Yamalning sog‘lig‘ini xavf ostiga qo‘ymasliklariga ishontirdi. 31 mart kuni Misrga qarshi bo‘lib o‘tadigan bahsda futbolchi to‘liq o‘ynamasligi kutilmoqda. Bu «Barselona»ning La Liga va Chempionlar Ligasi doirasida «Atletiko»ga qarshi o‘tadigan muhim o‘yinlari oldidan futbolchining kuchini asrab qolish uchun qilinmoqda.