«Barselona»ning o‘ng va chap qanot himoyachilari Jyul Kunde hamda Aleks Balde Ispaniya chempionatining 30-turidan o‘rin olgan Madridning «Atletiko»siga qarshi bahsda maydonga tushishlari mumkin. Bu haqda Mundo Deportivo nashri xabar berdi. Uchrashuv 4 aprel, shanba kuni bo‘lib o‘tadi.

Nashr ma’lumotiga ko‘ra, kataloniyaliklar fulbeklari mushak jarohatlaridan to‘liq tiklangan va jamoa mashg‘ulotlarida ishtirok etgan. Shu bilan birga, «ko‘k-anorranglilar» yarim himoyachisi Frenki de Yongning holati hali ham so‘roq ostida qolmoqda. U o‘ng oyog‘ining ikki boshli mushagi jarohati sabab bir oydan ortiq vaqtdan beri o‘yinlarda qatnashmayapti.

Hozirgi vaqtda «Barselona» 73 ochko bilan La Liga jadvalida peshqadamlik qilmoqda. Madridning «Real» jamoasi 69 ochko bilan ikkinchi o‘rinda bormoqda. 57 ochko jamg‘argan «Atletiko» esa to‘rtinchi pog‘onada joylashgan.