«Manchester Siti» yarim himoyachisi Bernardu Silva joriy mavsum yakunida klubini o‘zgartirishni rejalashtirmoqda. Bu haqda jurnalist va insayder Fabrisio Romano X ijtimoiy tarmog‘ida xabar qildi.

Manbaga ko‘ra, portugaliyalik futbolchining ketishi haqidagi xabarlar yanvar oyidan beri kuzatilmoqda. 31 yoshli o‘yinchiga Yevropa, Saudiya Arabistoni va AQSH klublari qiziqish bildirmoqda. Qayd etilishicha, qaror deyarli qabul qilingan, ammo hozircha rasmiy emas. Silva esa mavsumning hal qiluvchi qismida «Manchester Siti»ga to‘liq e’tibor qaratib, keyingi klubini shundan so‘ng tanlashni rejalashtirmoqda.

Futbolchining amaldagi shartnomasi 2026 yil 30 iyunga qadar amal qiladi. Portugaliyalik 2017 yildan buyon «Manchester Siti» safida to‘p surib kelmoqda. Shu vaqt davomida u barcha musobaqalarda 449 ta o‘yinda ishtirok etib, 76 ta gol urgan.

Shuningdek, u jamoa bilan birga olti marta Angliya chempioni bo‘lgan, besh marta Angliya Liga kubogini qo‘lga kiritgan, uch marta Angliya Superkubogida g‘alaba qozongan va ikki marta mamlakat kubogini yutib olgan. Bundan tashqari, uning hisobida Chempionlar ligasi, UYEFA Superkubogi va klublar o‘rtasidagi jahon chempionatidagi g‘alabalar ham mavjud.