«Barselona» vingeri Rafinya Braziliya terma jamoasi ixtiyorida bo‘lgan vaqtida jarohat oldi. Ushbu jarohat ancha jiddiy bo‘lib chiqdi — 29 yoshli futbolchining tiklanishi uchun taxminan besh hafta vaqt talab etiladi. Bu haqda kataloniyaliklar klubi bir necha kun avval e’lon qilgan edi.
Mundo Deportivo nashrining xabar berishicha, agar hammasi ko‘ngildagidek kechsa, Rafinya tiklanishi va «Real»ga qarshi kechadigan «el-klasiko»da ishtirok etishi kerak. Ispan futboli grandlari o‘rtasidagi ushbu bahs 10 may kuni «Kamp Nou» stadionida bo‘lib o‘tadi.
Hozirda «Barselona» 73 ochko bilan Ispaniya chempionati turnir jadvalida peshqadamlik qilmoqda. «Real» esa biroz ortda qolmoqda — madridliklar hisobida 69 ochko bor. Oldinda yana to‘qqizta tur mavjud.
