"Barselona" yarim himoyachisi Fermin Lopes nima sababdan gollarini aynan shu uslubda nishonlay boshlagani haqidagi savolga javob berdi. Eslatib o‘tamiz, futbolchi gol urganidan so‘ng, qo‘lini boshiga qo‘yib (harbiycha salom berishdek) nishonlaydi.

"Mening gol nishonlashim do‘stimning hazilidan boshlangan. U meni qo‘riqchiga o‘xshatishini aytgan va agar gol ursam, shunday qilishni maslahat bergandi. Bir safar shunday qildim va bu mening doimiy gol nishonlash uslubimga aylanib qoldi", — deya Lopesning so‘zlarini keltiradi Barça Universal.

Joriy mavsumda 22 yoshli Lopes barcha musobaqalarda 39 ta o‘yinda ishtirok etib, 12 ta gol urdi va 16 ta golli uzatmani o‘z hisobiga yozdirib qo‘ydi. Transfermarkt portali ma’lumotlariga ko‘ra, Fermin Lopesning bozor qiymati hozirda 100 million yevroni tashkil etmoqda.