Portugaliya terma jamoasi bosh murabbiyi Roberto Martines Krishtianu Ronaldu qachon faoliyatini yakunlashi haqidagi savolga javob berdi.

"Buni aytish men uchun qiyin. Krishtianu borasida kelajakni bashorat qilmaslik kerakligini juda tez tushunib yetdim. Uning mentaliteti aql bovar qilmas darajada, u doimo bugungi kun uchun eng yaxshi holatda bo‘lishga intiladi. Agar undan so‘rasangiz, u ham shu gapni aytadi. U oldindan rejalar tuzmaydi.

Uning yumshoq to‘qimalarida jarohat borligi rost. Ehtimol, keyingi haftada u guruh mashg‘ulotlariga tayyorgarlikni boshlay oladi. Bu jiddiy muammo emas.

Krishtianu — bizning sardorimiz. U jamoaga juda katta ta’sir ko‘rsatdi va muhim rol o‘ynadi. U bilan birga Millatlar ligasida g‘olib chiqdik. Uning jamoamiz uchun ahamiyati katta: u jarima maydonchasida so‘nggi harakatlarni amalga oshiradi, raqib darvozasiga xavf soladi va hujumlarni yakunlashni biladi. Uning fikrlash tarzi juda ilhomlantiradi. U har bir kunini go‘yoki oxirgi kunidek yashaydi va mukammallikka intiladi. Buning oxiri qachon kelishini hech qachon bilmaysiz", — dedi Martines.