Португалия терма жамоаси бош мураббийи Роберто Мартинес Криштиану Роналду қачон фаолиятини якунлаши ҳақидаги саволга жавоб берди.

"Буни айтиш мен учун қийин. Криштиану борасида келажакни башорат қилмаслик кераклигини жуда тез тушуниб етдим. Унинг менталитети ақл бовар қилмас даражада, у доимо бугунги кун учун энг яхши ҳолатда бўлишга интилади. Агар ундан сўрасангиз, у ҳам шу гапни айтади. У олдиндан режалар тузмайди.

Унинг юмшоқ тўқималарида жароҳат борлиги рост. Эҳтимол, кейинги ҳафтада у гуруҳ машғулотларига тайёргарликни бошлай олади. Бу жиддий муаммо эмас.

Криштиану — бизнинг сардоримиз. У жамоага жуда катта таъсир кўрсатди ва муҳим рол ўйнади. У билан бирга Миллатлар лигасида ғолиб чиқдик. Унинг жамоамиз учун аҳамияти катта: у жарима майдончасида сўнгги ҳаракатларни амалга оширади, рақиб дарвозасига хавф солади ва ҳужумларни якунлашни билади. Унинг фикрлаш тарзи жуда илҳомлантиради. У ҳар бир кунини гўёки охирги кунидек яшайди ва мукаммалликка интилади. Бунинг охири қачон келишини ҳеч қачон билмайсиз", — деди Мартинес.