Italiya terma jamoasi himoyachisi Leonardo Spinassola Jahon chempionati — 2026 yo‘llanmasi uchun kechgan «A» yo‘li pley-off finalida Bosniya va Gersegovinaga qarshi o‘yindagi (1:1, penaltilar seriyasida — 1:4) mag‘lubiyatdan so‘ng o‘z hissiyotlari bilan o‘rtoqlashdi.
«Biz bu o‘yinga bor vujudimiz bilan yondashdik va g‘alaba qozonish uchun uch-to‘rtta imkoniyatga ega bo‘ldik. Bu biz uchun, oilalarimiz va Italiyani Jahon chempionatida [ketma-ket uchinchi bor] ko‘ra olmaydigan barcha italiyalik bolajonlar uchun ulkan umidsizlikdir. Yosh futbolchilarning yig‘layotganini ko‘rish juda mahzun, lekin ularning oldida porloq kelajak turibdi. Albatta, bu mening Jahon chempionatiga borish uchun oxirgi imkoniyatim edi, biroq men butun Italiya uchun afsusdaman», — deya Spinassolaning so‘zlarini UEFA rasmiy sayti keltirmoqda.
Shu tariqa, Italiya milliy terma jamoasi ketma-ket uchinchi bor futbol bo‘yicha Jahon chempionatining final bosqichida ishtirok etmaydigan bo‘ldi.
