«Barselona» futbolchisi Lamin Yamal Ispaniya terma jamoasi muxlislarining xatti-harakatidan hafsalasi pir bo‘ldi. Seshanba kuni «qizil furiya» Misr terma jamoasi bilan o‘rtoqlik uchrashuvida durang o‘ynadi (0:0).

O‘yin davomida «Espanyol» stadioniga kelgan muxlislar Yamalga qaratilgan haqoratli hayqiriqlarni ishlatishdi, bu esa yosh vingerni qattiq xafa qildi. SER nashri bergan ma’lumotga ko‘ra, final hushtagidan so‘ng futbolchi tomoshabinlarga minnatdorchilik bildirib o‘tirmagan va stadionni barcha jamoadoshlaridan oldinroq tark etgan.

Lamin Yamal uchrashuvning birinchi bo‘limi yakuniga qadar harakat qildi va shundan so‘ng almashtirildi.

Eslatib o‘tamiz, 4 aprel kuni «Barselona» navbatdagi o‘yinini o‘tkazadi — Madridning «Atletiko» klubi raqiblik qiladi.