"Tottenxem" muxlislari birlashmasi (Tottenham Hotspur Supporters’ Trust) Roberto De Dzerbining klub bosh murabbiyi etib tayinlanishini qoralab chiqdi. Bunga mutaxassisning "Marsel" vingeri Meyson Grinvudni himoya qilib aytgan gaplari sabab bo‘lgan. Eslatib o‘tamiz, futbolchi 2022 yilda qiz bolaga nisbatan zo‘ravonlik qilishda ayblangan, biroq 2023 yilda ayblovlar olib tashlangan edi.

"Biz APLda tajribaga ega bo‘lgan murabbiylar doirasi cheklanganligini va "Tottenxem"ning quyi ligaga tushib ketish xavfi ostida turgani sababli tezkor harakat qilish zarurligini tan olsak-da, bu tayinlov jiddiy va uzoq davom etuvchi xavotirlarni keltirib chiqarmoqda. Ko‘plab muxlislar o‘z tuyg‘ulari qanchalik jiddiy ekanini yetkazish uchun bizga murojaat qilishdi. Biz bu masalalarni tayinlov e’lon qilinishidan oldin klub rahbariyati oldiga to‘g‘ridan-to‘g‘ri qo‘ygan edik.

Klub avvalroq ayollar va qizlarga nisbatan zo‘ravonlik holatlariga qarshi turishga, bunday voqealar yuzaga kelganda halol harakat qilishga va o‘z qadriyatlarini himoya qilishga tayyorligini bildirgan edi. De Dzerbining Meyson Grinvud haqidagi fikrlari keraksiz, o‘ylamay aytilgan va ko‘p sonli muxlislar uchun haqoratli bo‘ldi, shuningdek, erkaklar tomonidan zo‘ravonlikka uchragan qurbonlarni shubhasiz tashvishga soldi.

Bizningcha, bu bayonotlar barchamiz jamoani qo‘llab-quvvatlash uchun birlashishimiz kerak bo‘lgan vaqtda muxlislar o‘rtasida bo‘linishni keltirib chiqaradi. Klub bizni aynan jamoa muxlislarga eng ko‘p muhtoj bo‘lgan paytda shunday holatga solib qo‘ygani tashvishlidir.

Klub va De Dzerbi klub qadriyatlarini qo‘llab-quvvatlashlarini aniq va shubhasiz bayon qilishlari kerak. Bundan tashqari, bu bayonotlar amaliy ishlar, jumladan, ayollar xayriya tashkilotlari va zo‘ravonlikka qarshi kurashuvchi tashkilotlarni doimiy qo‘llab-quvvatlash bilan mustahkamlanishi lozim", — deyiladi muxlislarning The Touchline nashri tomonidan e’lon qilingan bayonotida.