Chexiya terma jamoasi bosh murabbiyi Miroslav Koubek shogirdlari jahon chempionatiga yo‘llanma olganidan so‘ng o‘z fikrlarini bildirdi. Hal qiluvchi bahsda chexlar Daniyani penaltilar seriyasida 3:1 hisobida mag‘lub etishdi (asosiy vaqt — 1:1, qo‘shimcha vaqtlar bilan — 2:2).

«Futbolchilar meni qo‘llarida ko‘tarib aylantirishganda ko‘zlarimga yosh keldi. Bu jamoa uchun ham, shaxsan men uchun ham eng katta muvaffaqiyatdir», — deya murabbiyning so‘zlarini keltirmoqda UYEFA rasmiy sayti.

Miroslav Koubek o‘tgan yilning dekabr oyida vaqtinchalik murabbiy Yaroslav Kyostl o‘rniga Chexiya terma jamoasi jilovini o‘z qo‘liga olgan edi. Kyostl saralash bahsida Farer orollaridan uchralgan mag‘lubiyat (1:2) sabab iste’foga chiqarilgan Ivan Gashekdan so‘ng jamoani bir necha oy boshqargandi.

Chexiya 2006 yildan beri ilk bor jahon chempionatida ishtirok etadi. Jamoa "A" guruhida Janubiy Koreya, Janubiy Afrika Respublikasi va Meksika terma jamoalariga qarshi bahs yuritadi.