«Barselona» vingeri Lamin Yamal Ispaniya va Misr terma jamoalari o‘rtasidagi o‘rtoqlik uchrashuvidan (0:0) so‘ng bayonot bilan chiqdi. 18 yoshli Yamal ispaniyalik muxlislarning musulmonlarga qaratilgan haqoratli hayqiriqlarini keskin qoraladi.
«Real» hujumchisi Vinisius Junior Yamalning ushbu bayonotiga munosabat bildirdi. Braziliyalik yulduz «Barselona» futbolchisining ijtimoiy tarmoqdagi postiga «layk» bosib, uni qo‘llab-quvvatladi.
«Barselona» ayni damda Ispaniya chempionati turnir jadvalida peshqadamlik qilmoqda. «Real» esa kataloniyaliklardan to‘rt ochko orqada qolgan holda ikkinchi o‘rinda bormoqda. Kelasi oyda, 10 may kuni «Kamp Nou» stadionida «Barselona» va «Real» o‘rtasida «El Klasiko» bo‘lib o‘tadi. Ushbu uchrashuv La Liga chempionligi uchun kurashda hal qiluvchi ahamiyatga ega bo‘lishi mumkin.
