«Liverpul» va Argentina terma jamoasi yarim himoyachisi Aleksis Mak Allister o‘tgan yilgi jarohatidan so‘ng o‘z sog‘lig‘i va tiklanish jarayoniga bo‘lgan munosabati qanday o‘zgargani haqida so‘zlab berdi.
«Biz Premyer-ligada g‘olib chiqdik, bu ajoyib edi. Ammo mavsum yakuniga kelib men kuchli og‘riqlarni his qilardim va o‘zimni yomon sezardim. Hatto mavsumlararo yig‘inlar boshlanganda ham hali to‘liq tiklanib ulgurmagandim», — deydi futbolchi.
Aleksisning ta’kidlashicha, qizining dunyoga kelishi uning hayot tarzini o‘zgartirishga undagan:
«Qizim tug‘ilgach, uning yonida bo‘lish uchun ko‘proq energiyaga ega bo‘lishni va o‘zimni yaxshiroq his qilishni istadim. Shundan so‘ng tanamga ko‘proq quloq sola boshladim».
Endilikda argentinalik yulduz tiklanish uchun zamonaviy vositalardan foydalanmoqda:
-
Qizil nur paneli: Bu moslama shamollashni kamaytirishga va tanada energiya ishlab chiqarishni kuchaytirishga yordam beradi.
-
Melatonin nazorati: «Kech tushganda tana tabiiy ravishda melatonin ishlab chiqarishni boshlaydi. Ammo uyda chiroqlar juda yorqin bo‘lsa, bu jarayon to‘xtab qolishi mumkin. Qizil chiroq esa uyqu sifatini yaxshilashga xizmat qiladi».
-
Maxsus botinkalar: Jismoniy holatni me’yorda ushlab turish uchun qo‘shimcha vosita.
Makallisterning aytishicha, ushbu kichik detallar unga nafaqat maydonda, balki hayotda ham katta kuch bag‘ishlamoqda.
