Ispaniya terma jamoasi ustozi Luis de la Fuente Italiya milliy jamoasining 2026 yilgi Jahon chempionatiga chiqa olmagani haqida o‘z fikrlarini bildirdi. Hal qiluvchi o‘tish o‘yinida Jennaro Gattuzo shogirdlari sensasion tarzda Bosniya va Gersegovinaga imkoniyatni boy berishdi (1:1, penaltilar bo‘yicha 1:4).
«Bunday saralash bosqichidan o‘tish juda murakkab. Italiya qatorasiga uchinchi mundialda ishtirok etmaydigan bo‘ldi. Bu holat ularning avvalgi erishgan yutuqlari qanchalik qadrli bo‘lganini yana bir bor ta’kidlaydi», — deya mutaxassisning so‘zlarini keltiradi AS nashri.
Jahon chempionati kelayotgan yozda Shimoliy Amerikada bo‘lib o‘tadi. Nufuzli turnir bahslariga AQSH, Kanada va Meksika mezbonlik qiladi. Argentinalik futbolchilar amaldagi chempion hisoblanishadi.
