Испания терма жамоаси устози Луис де ла Фуэнте Италия миллий жамоасининг 2026 йилги Жаҳон чемпионатига чиқа олмагани ҳақида ўз фикрларини билдирди. Ҳал қилувчи ўтиш ўйинида Женнаро Гаттузо шогирдлари сенсацион тарзда Босния ва Герцеговинага имкониятни бой беришди (1:1, пенальтилар бўйича 1:4).
«Бундай саралаш босқичидан ўтиш жуда мураккаб. Италия қаторасига учинчи мундиалда иштирок этмайдиган бўлди. Бу ҳолат уларнинг аввалги эришган ютуқлари қанчалик қадрли бўлганини яна бир бор таъкидлайди», — дея мутахассиснинг сўзларини келтиради AS нашри.
Жаҳон чемпионати келаётган ёзда Шимолий Америкада бўлиб ўтади. Нуфузли турнир баҳсларига АҚШ, Канада ва Мексика мезбонлик қилади. Аргентиналик футболчилар амалдаги чемпион ҳисобланишади.
