Madridning «Real» klubi yarim himoyachisi Federiko Valverde o‘zining kuchli zarbalari bilan mashhur, bundan esa ba’zida jamoadoshlari aziyat chekib turishadi.
Urugvaylik futbolchi mashg‘ulotlardagi kuchli zarbalari bilan bir necha bor darvozabonlarni jarohatlab qo‘yganini tan oldi.
«Ha, shunday holatlar bo‘lgan. Yelka boylamlari uzilishi, hatto ba’zida ularning yelkasi bo‘g‘imidan chiqib ketgan holatlar ham kuzatilgan. Bir safar Lyuka Zidanni jarohatlab qo‘yganman, o‘sha lahzada qo‘rquvdan o‘lgudek bo‘lgandim, chunki u murabbiyning o‘g‘li edi. O‘shanda: «Meni «Real»dan haydab yuborishadi», deganman», — deya Valverdening so‘zlarini keltiradi Madrid Zone nashri.
27 yoshli yarim himoyachi klub va terma jamoa safidagi oxirgi yettita o‘yinda yettita gol urdi. Mart oyida futbolchi faoliyatida ilk bor xet-trik qayd etdi — u «Santyago Bernabeu»da «Manchester Siti» darvozasini uch bor ishg‘ol qilishga muvaffaq bo‘ldi.
