UYEFA prezidenti Aleksander Cheferin Italiya futbolidagi muammolar nima bilan bog‘liqligini tushuntirib berdi. Eslatib o‘tamiz, Italiya terma jamoasi JCH-2026 saralashi pley-off finalida Bosniya va Gersegovinaga imkoniyatni boy berib, ketma-ket uchinchi bor Jahon chempionatidan quruq qoldi.

"Ba’zi odamlarning "yashirincha" nimadir noto‘g‘ri bo‘lishini kutib turishi, keyin esa birdan paydo bo‘lib, tanqid qilishni boshlashi meni g‘azablantiradi va xafa qiladi. Ular Italiyaga emas, o‘zlariga muxlislik qilishadi. Ayting-chi, italiyalik futbolchilardan kim chaqirilishi kerak edi-yu, lekin chaqirilmadi? Futbol shunaqa narsa, hatto eng yaxshi o‘yinchilar maydonda bo‘lsa ham, har kim yutqazib qo‘yishi mumkin.

Italiya — eng buyuk futbol mamlakatlaridan biri va u albatta cho‘qqiga qaytadi. Italiya futbolining eng katta muammosi — futbol siyosati va "oddiy" siyosat o‘rtasidagi o‘zaro munosabatlardir. Agar hamma bir-biri bilan hamkorlik qilganida, siz tez orada yana Yevropa va Jahon chempioni bo‘lgan bo‘lardingiz. Agar o‘sha odamlar shu ruhda davom etishsa, futboldagi ishlar yanada yomonlashib ketaveradi", — dedi Cheferin.