«Yuventus» klubi markaziy hujumchi Dushan Vlaxovich bilan shartnomani uzaytirish bo‘yicha muzokaralarni qayta tikladi. Bu haqda La Gazzetta dello Sport nashri xabar bermoqda.
Manbaning ma’lumotlariga ko‘ra, serbiyalik futbolchi bilan tuziladigan yangi mehnat kelishuvi 1-2 yilga mo‘ljallanadi. Shu bilan birga, Vlaxovichning ish haqi qariyb ikki baravarga kamaytiriladi.
Avvalroq, 26 yoshli forvard «Milan» klubining transfer maqsadlaridan biri ekanligi haqida xabar berilgan edi.
Vlaxovich 2022 yilning qishida «Fiorentina»dan o‘tish orqali Turin klubi safiga kelib qo‘shilgan edi. Joriy mavsumda hujumchi 18 ta o‘yinda ishtirok etib, o‘z hisobiga oltita gol va ikkita golli uzatmani yozdirib qo‘ydi.
Vlaxovichning «Yuventus» bilan amaldagi shartnomasi uch oydan keyin yakuniga yetadi.
