«Ювентус» клуби марказий ҳужумчи Душан Влахович билан шартномани узайтириш бўйича музокараларни қайта тиклади. Бу ҳақда La Gazzetta dello Sport нашри хабар бермоқда.

Манбанинг маълумотларига кўра, сербиялик футболчи билан тузиладиган янги меҳнат келишуви 1-2 йилга мўлжалланади. Шу билан бирга, Влаховичнинг иш ҳақи қарийб икки бараварга камайтирилади.

Аввалроқ, 26 ёшли форвард «Милан» клубининг трансфер мақсадларидан бири эканлиги ҳақида хабар берилган эди.

Влахович 2022 йилнинг қишида «Фиорентина»дан ўтиш орқали Турин клуби сафига келиб қўшилган эди. Жорий мавсумда ҳужумчи 18 та ўйинда иштирок этиб, ўз ҳисобига олтита гол ва иккита голли узатмани ёздириб қўйди.

Влаховичнинг «Ювентус» билан амалдаги шартномаси уч ойдан кейин якунига етади.