Niderlandiyaning «Ayaks» klubi jamoa boshqaruvini ispaniyalik mutaxassisga topshirmoqchi. Taniqli jurnalist Matteo Morettoning ijtimoiy tarmoqlarda xabar berishicha, Erediviziya grandi Michel bilan shartnoma imzolash bo‘yicha muzokaralar olib bormoqda. Ushbu mutaxassis 2021 yil yozidan beri «Jirona» klubida faoliyat yuritib kelmoqda.

Yaqindagina Michel o‘zini «Manchester Siti» bosh murabbiyi sifatida ko‘rayotgani haqida gapirgan edi. Avvalroq matbuotda Michel «shaharliklar» boshqaruvida Xosep Gvardiolaning o‘rnini egallashi mumkinligi haqida yozilgandi.

Hozirda «Ayaks» Niderlandiya chempionati turnir jadvalida to‘rtinchi o‘rinni egallab turibdi. Michel boshqarayotgan «Jirona» esa La Liga jadvalining 13-pog‘onasidan joy olgan.