Нидерландиянинг «Аякс» клуби жамоа бошқарувини испаниялик мутахассисга топширмоқчи. Таниқли журналист Маттео Мореттонинг ижтимоий тармоқларда хабар беришича, Эредивизия гранди Мичел билан шартнома имзолаш бўйича музокаралар олиб бормоқда. Ушбу мутахассис 2021 йил ёзидан бери «Жирона» клубида фаолият юритиб келмоқда.
Яқиндагина Мичел ўзини «Манчестер Сити» бош мураббийи сифатида кўраётгани ҳақида гапирган эди. Аввалроқ матбуотда Мичел «шаҳарликлар» бошқарувида Хосеп Гвардиоланинг ўрнини эгаллаши мумкинлиги ҳақида ёзилганди.
Ҳозирда «Аякс» Нидерландия чемпионати турнир жадвалида тўртинчи ўринни эгаллаб турибди. Мичел бошқараётган «Жирона» эса Ла Лига жадвалининг 13-поғонасидан жой олган.
