Dortmundning «Borussiya» klubi markaziy himoyachisi Niko Shlotterbek o‘z kuchini Madridning «Real» klubida sinab ko‘rmoqchi.

26 yoshli futbolchi «asalarilar» bilan shartnomasini uzaytirishga yaqin edi, biroq yaqin kunlarda ma’lum bo‘lishicha, muzokaralar boshi berk ko‘chaga kirib qolgan. Shu tariqa, germaniyalik markaziy himoyachiga da’vogarlik qilayotgan klublar transfer kurashini qayta boshlashlari mumkin. Jurnalist Florian Plettenbergning xabar berishicha, Shlotterbekning o‘zi «Real»ga o‘tishni afzal ko‘rmoqda — u «qirollik klubi» safiga qo‘shilishni orzu qiladi. Agar futbolchi mehnat shartnomasini uzaytirmaydigan bo‘lsa, «Borussiya» uni kelayotgan yozda taxminan 30 million yevro evaziga sotishga majbur bo‘ladi.

Transfermarkt ekspertlari Niko Shlotterbekning bozor qiymatini 55 million yevroga baholamoqda.