Superliga 5-turi doirasidagi «Xorazm» - «Dinamo» (2:1) uchrashuvidan keyin jamoamiz bosh murabbiyi Vadim Abramov matbuot anjumanida qatnashib, jurnalistlar savollariga javob qaytardi.

- Bugun barcha maydonda futbol ko‘rdi. Menimcha, «Xorazm» kuchli ishtiyoqi evaziga g‘alabaga erishdi, men shunday deb o‘ylayman. Afsuski, ba’zida o‘yin davomida barchasi sen uchun qarshi ishlayotgandek bo‘ladi, chunki bunday o‘yinda ikkita gol o‘tkazadigan darajada xavf yo‘q edi. Yo‘q joydan gol o‘tkazgach, ikkinchi bo‘limda hisobni tenglashtirdik va ikkinchi gol uchun hujumkorlikni oshirgandik. Ammo shunday gol o‘tkazdikki, omad raqib tomonda edi.

- Darvozabonning gollardagi xatosini qanday izohlaysiz?
- Nima ham derdim, bu futbol. Darvozabonimiz 1-golda hali to‘pni qo‘lga kiritmay, katta ishtiyoq sabab hujumni boshlash haqida o‘yladi, chog‘i.

- «Dinamo» muammolar ichida. Yaqinda chiqqan qaror jamoaning muammolarini qay daraja yechadi deb o‘ylaysiz?
- Bilmadim, men jamoani o‘yinga tayyorlashim, mashg‘ulotlarni o‘tkazishim kerak. Bu masalani izohlay olmayman. Hozircha pul yo‘q edi, hali ham yo‘q. Buyog‘iga qanday bo‘ladi, bilmayman.

- Bilishimizcha, «Dinamo»ga oylik maoshlar berilmayotganining 5-oyi boshlangan. Masalan, «Xorazm»da oylik maoshlar bo‘yicha qarzdorlik yo‘q, deyishdi. Aprel oyida esa jamoangizni ketma-ket yana 5ta muhim o‘yin kutib turibdi. Bu holatda qiyin vaziyatdan qanday chiqib ketmoqchiciz?
- Javob berish qiyin. Maydonga chiqib o‘ynash kerak, bizdan talab etiladigani shu. Boshqa tarafdan maydonga men emas, futbolchilar chiqadi. Har bir futbolchining miyasida nima borligini bilmayman, kirib chiqa olmayman chunki. Hammaning o‘z muammosi bor. Yigitlarni imkonqadar tayyorlayapmiz, ruhlantirib, gapiryapmiz. Ammo hozircha barchasiz biz o‘ylagandek bo‘lmayapti, - dedi Vadim Karlenovich Urganchdagi o‘yindan keyin o‘tkazilgan matbuot anjumanida.