O‘zbekiston Superligasining 5-turidan o‘rin olgan uchrashuvda «Nasaf» Samarqandda «Andijon»ni qabul qildi. Ehtiyotkorlik va kurashlarga boy kechgan bahsda qarshiliklar 1:0 hisobida g‘alaba qozondi.

O‘yinning ilk daqiqalarida jamoalar asosan ehtiyotkor harakat qildi. 11-daqiqada Rustamovning zarbasi noaniq chiqdi. 15-daqiqada esa Islom To‘xtaxo‘jayev raqibni qo‘pollik bilan to‘xtatib qolgani uchun sariq kartochka oldi.

Birinchi bo‘lim davomida jiddiy golli vaziyatlar kam kuzatildi. Shunga qaramay, taym so‘nggida «Nasaf» darvozaboni Abduvohidning ajoyib seyvi jamoasini muqarrar goldan qutqarib qoldi. Natijada, birinchi bo‘lim 0:0 hisobida yakunlandi.

Ikkinchi bo‘limda ham o‘yin uzoq vaqt davomida teng kurashlar ostida o‘tdi. 68-daqiqada Rustamovning xavfli reydi himoyachilar tomonidan to‘xtatildi. Uchrashuv taqdiri esa 77-daqiqada hal bo‘ldi.

Zafarmurod Abdurahmatov to‘pni egallab, olis masofani bosib o‘tdi va jarima maydoniga kirib, narigi qanotga juda qulay uzatma berdi. Murodbek Rahmatov to‘pni darvozaga yo‘llab, hisobni ochdi. Shu gol o‘yindagi yagona va hal qiluvchi zarba bo‘lib chiqdi.

Qolgan daqiqalarda «Nasaf» ustunlikni saqlab qolishga harakat qildi, «Andijon» esa hisobni tenglashtirish uchun oldinga o‘tdi. Biroq mezbonlar ishonchli himoya bilan g‘alabani qo‘ldan chiqarmadi.

Shu tariqa, «Nasaf» 1:0 hisobida g‘alaba qozonib, navbatdagi muhim 3 ochkoga ega bo‘ldi.

Superliga, 5-tur
"NASAF" - "ANDIJON" - 1:0
Gol: Murodbek Rahmatov (77)