«Chelsi» bosh murabbiyi Liam Rosenyor o‘z sha’niga bildirilayotgan tanqidlar haqida nima deb o‘ylashini aytib o‘tdi.

So‘nggi vaqtlarda ingliz mutaxassisi qo‘l ostidagi «ko‘klar» unchalik ta’sirli natijalar qayd etmayapti. Ayni damda jamoa Premyer-liga turnir jadvalida oltinchi o‘rinni egallab turibdi.

«Agar men klubga kelgan vaqtdan boshlab qayd etilgan natijalarni olsak, biz APLda to‘rtinchi o‘rindamiz. Klub atrofida shov-shuvlar juda ko‘p: odamlar jamoa inqirozda ekanini, men vazifamni uddalay olmayotganimni va bema’ni gaplarni gapirayotganimni aytishmoqda. Men bu gap-so‘zlarning barchasini eshityapman», — deya Rosenyorning so‘zlarini jurnalist Fabrisio Romano keltirmoqda.

Bugun londonliklar o‘z maydonlarida Angliya Kubogi 1/4 finali doirasida «Port Veyl» jamoasini qabul qilishadi.