Myunxenning «Bavariya» klubi sport direktori Maks Eberl hujumchi Xarri Keynning kelajagi haqida o‘z fikrlarini bildirdi.
«Biz u bilan yozda gaplashib olamiz. Men uni kuzatyapman, u o‘zini juda yaxshi his qilmoqda. U jamoa bilan sovrinlar yutmoqda, individual mukofotlarga ega chiqmoqda va rekordlarni yangilamoqda. U «Bavariya»ga o‘tganidan beri unga bo‘lgan hurmat, hatto Angliyada ham keskin oshdi», — deya funksionerning so‘zlarini jurnalist Manuel Bonke keltirmoqda.
Keyn 2023 yilning yozida «Bavariya» futbolchisiga aylangan edi. Joriy mavsumda u barcha turnirlarda 40 ta uchrashuvda maydonga tushib, 48 ta gol urdi va 5 ta golli uzatmani amalga oshirdi.
To‘purarning «Bavariya» bilan amaldagi shartnomasi 2027 yil o‘rtalarigacha mo‘ljallangan.
