«PSJ» vingeri Usmon Dembele Fransiya chempionatining 28-turidan o‘rin olgan «Tuluza»ga qarshi bahs (3:1) haqidagi fikrlari bilan o‘rtoqlashdi. Ushbu uchrashuvda futbolchi dubl qayd etishga muvaffaq bo‘ldi.
«Birinchi golim? Bu juda qiyin zarba edi. Agar shunday vaziyatda 10 marta zarba berganimda, ehtimol, faqat bittasi gol bilan yakunlanardi. To‘p menga shunchalik sekin uchib kelayotgan ediki, men tavakkal qilib ko‘rish kerak deb o‘yladim. Va bu o‘z samarasini berdi. Ajoyib gol. Aytishim mumkin bo‘lsa, bu gol faoliyatimdagi eng sevimli uch golim qatoriga kiradi. Biroq «Lill» darvozasiga kiritgan to‘pim hamon ro‘yxatimda birinchi o‘rinda turibdi», — deya Dembelening so‘zlarini Ligue 1+ nashri keltirmoqda.
«PSJ» 63 ochko bilan turnir jadvalida peshqadamlik qilmoqda. Ikkinchi o‘rindagi «Lans» hisobida 4 ochko kam. «Tuluza» esa 37 ochko bilan to‘qqizinchi o‘rinni egallab turibdi.
