Madridning «Real» klubi bosh murabbiyi Alvaro Arbeloa Chempionlar ligasi chorak finalidan o‘rin olgan «Bavariya»ga qarshi bo‘lajak o‘yin haqida o‘z fikrlarini bildirdi.
«Men futbolchilarim seshanba kungi bahsda g‘alaba qozona olishimizni bilishlarini istayman. Men o‘z o‘yinchilarimni va ular «Bavariya»ga qarshi uchrashuvga qanchalik katta ahamiyat berishlarini yaxshi bilaman. Ishonchim komilki, muxlislar hayajonda bo‘lishadi, futbolchilar esa faqat g‘alaba uchun maydonga tushishadi», — deya Arbeloaning so‘zlarini keltiradi jurnalist Fabrisio Romano.
Avvalroq «Real» Ispaniya La Ligasi 30-turida «Malyorka»ga imkoniyatni boy bergan edi. Uchrashuv 1:2 hisobida yakunlangan.
7 aprel kuni «qaymoqranglilar» Chempionlar ligasi chorak finalining dastlabki bahsida «Bavariya»ni qabul qilishadi. To‘qnashuv Toshkent vaqti bilan 00:00 da (6 apreldan 7 aprelga o‘tar kechasi) boshlanishi rejalashtirilgan.
