Мадриднинг «Реал» клуби бош мураббийи Альваро Арбелоа Чемпионлар лигаси чорак финалидан ўрин олган «Бавария»га қарши бўлажак ўйин ҳақида ўз фикрларини билдирди.

«Мен футболчиларим сешанба кунги баҳсда ғалаба қозона олишимизни билишларини истайман. Мен ўз ўйинчиларимни ва улар «Бавария»га қарши учрашувга қанчалик катта аҳамият беришларини яхши биламан. Ишончим комилки, мухлислар ҳаяжонда бўлишади, футболчилар эса фақат ғалаба учун майдонга тушишади», — дея Арбелоанинг сўзларини келтиради журналист Фабрицио Романо.

Аввалроқ «Реал» Испания Ла Лигаси 30-турида «Мальорка»га имкониятни бой берган эди. Учрашув 1:2 ҳисобида якунланган.

7 апрель куни «қаймоқранглилар» Чемпионлар лигаси чорак финалининг дастлабки баҳсида «Бавария»ни қабул қилишади. Тўқнашув Тошкент вақти билан 00:00 да (6 апрелдан 7 апрелга ўтар кечаси) бошланиши режалаштирилган.