«Nyukasl» klubi 24 yoshli urugvaylik yarim himoyachi Manuel Ugarte bilan shartnoma imzolash imkoniyatlarini ko‘rib chiqmoqda. Bu haqda CaughtOffside nashri xabar bermoqda.
Ugartening «MYU» bilan shartnomasi 2029 yil yozigacha mo‘ljallangan. Biroq futbolchi uchun joriy mavsum muvaffaqiyatsiz kechdi. Urugvaylik futbolchi qishki transfer oynasidayoq jamoani tark etmoqchi bo‘lgan edi, ammo o‘sha paytda klub bu o‘tishga to‘sqinlik qilgan. Insayderlarning ta’kidlashicha, yozda Ugartening jamoadan ketish ehtimoli juda yuqori.
Joriy mavsumda yarim himoyachi «mankunianliklar» safida 23 ta o‘yinda maydonga tushdi, lekin birorta ham natijali harakatni amalga oshira olmadi. «Qarg‘alar» esa maydon markazini aynan shunday kurashuvchan futbolchi bilan kuchaytirishni rejalashtirmoqda.
