«Roma» uchun Milan safari nafaqat turnir jadvalida peshqadamlik qilayotgan «Inter»dan qabul qilingan 2:5 hisobidagi mag‘lubiyat, balki kadrlar yo‘qotishi bilan ham muvaffaqiyatsiz kechdi. Jan Pyero Gasperini shogirdlari ushbu bahsda Janluka Manchinidan ayrildi — futbolchi jarohat olib, maydonni muddatidan avval tark etishga majbur bo‘ldi.
Forzaroma.info nashrining chuqurlashtirilgan tibbiy ko‘rik natijalariga tayanib xabar berishicha, Manchini eng yaxshi holatda 25 aprel kuni bo‘lib o‘tadigan «Bolonya»ga qarshi o‘yingacha safga qaytishi mumkin. Biroq, futbolchining ushbu bahsni ham o‘tkazib yuborish ehtimoli yo‘q emas.
Ayni damda «Roma» Italiya A Seriyasi turnir jadvalida oltinchi o‘rinni egallab turibdi.













